Кыргыз Республикасынын улуттук валютасынын жүгүртүүгө киргизилгендигинин 30 жылдыгын белгилөөнүн алкагында Кыргыз Республикасынын Улуттук банкынын Жалал-Абад областтык башкармалыгы 2023-жылдын 10-майында Жалал-Абад областтык Барпы Алыкулов атындагы кыргыз драма театрында Кыргыз Республикасынын Президентинин Жалал-Абад областындагы ыйгарым укуктуу өкүлү, Жалал-Абад шаарынын мэри, Жалал-Абад областындагы банктардын, финансы-кредит уюмдарынын жана башка мекеме менен ведомстволордун өкүлдөрү катышкан салтанаттуу иш-чара өткөрдү. Аталган иш-чарада улуттук валюта – кыргыз сомунун калыптануу тарыхы боюнча маалымат берилип, Жалал-Абад областындагы банктардын, финансы-кредит уюмдарынын кызматкерлерин, пенсионерлерин сыйлоо аземи болуп өттү.  

Ошондой эле Улуттук банк тарабынан чыгарылган коллекциялык монеталардын нумизматикалык көргөзмөсү уюштурулду. Алар кыргыз элинин тарыхы менен маданий мурасын терең чагылдырылган, жогорку көркөм чеберчиликте жасалган нумизматикалык коллекциялык баалуулук болуп саналат. 

Мындан тышкары, көргөзмөгө келгендер үчүн Улуттук банк тарабынан чыгарылган коллекциялык нумизматикалык монеталарды сатуу уюштурулду.